مكانك هنا

أبطى وخلا سؤال يلهث بـ صدري ،،
مدري يصون الغلا !!  مدري هو يخونه ؟!

ويوم إني أسج بين أدري وما أدري !!
جا عقب البطا يسأل مكاني شلونه ؟!

قلت انت مكانك هنا .. وأشرت ع صدري ،،
وقال وانت مكانك هنا .. وأشر على عيونه

القلب جوى

غـروٍ نياشين الغلا في عيونه ،،
يضحك ويشرلي على القلب جوى

يقول هذا لك .. ولا يقربونه ،،
وأبو الذي يزعل بـ عـشرين ضوى

وأنا مليك رضاه ما أجوز دونه ،،
 قلبي معه في يديه من حيث موى

حيث إني أفهم ماخفى من ظنونه ،،
وأدري بـ قلبه من قديم وتوى

لـ محمد الخس (البستان)

القلوب الهشايش

المشكلة ماهي بـ هذي ولا ذيك ،،
المشكلة لا حبت العين طايش

تزعل ويضحك وإن تبسمت يبكيك ،،
الموت جاك وهو بـ الأفراح عايش

تناقشه يزعل .. تداريه يشقيك ،،
ترقع شروخ .. ويطلعن لك درايش

ما ينتراضى .. وبـ الزعل مايراضيك ،،
والصبر يثر بـ القلوب الهشايش

لـ عابرة سبيل

طبعي كذا

طبعي كذا ما يخـجل الدمع عيني ،،
دامه حنان داخل الروح ماهنت

ماني ضعيف بـ دمعتي وافهميني ،،
أنـا الذي بـ يدين الأيام ما لنت

كانك تعبتي .. جنبي واتركيني ،،
 صدي مثل ما صـدوا الغير يابنت

أنا عزاي أن الوفا محتويني ،،
وإن خان غيري .. بعت دمي ولاخنت

لـ سليمان المانع

بعض الجروح

بعض الجروح نحبهـا .. لو هي جـروح ،،
يسعد مسا جرحك .. ويسعـد صباحه

 مسموح لو توجع خـطـاياك .. مسموح ،،
حكم الخطايا منك فيني مباحه

 حتى ولو قلبي بـ يدّيك مذبـوح ،،
يضحك وكنه جالس بـ استراحه

 لـ خلف المشعان